Psa 46 | NdeIBE | STEP | Kumqondisi wokuhlabela. ElamaDodana kaKhora. Ingoma. UNkulunkulu uyisiphephelo sethu lamandla ethu, usizo oluhlezi lukhona nxa kulohlupho.

Psalms 46

1 UNkulunkulu uyisiphephelo sethu lamandla ethu, usizo oluhlezi lukhona nxa kulohlupho.

2 Ngakho kangiyikwesaba, umhlaba ungaze ubhidlike lezintaba ziwele ekujuleni kolwandle,

3 loba amanzi alo ehlokoma agubhazele izintaba zivevezele ngokuqubuka kwalo.

4 Kukhona umfula oziphethu zawo zithokozisa idolobho likaNkulunkulu, indawo engcwele okuhlala kuyo oPhezukonke.

5 UNkulunkulu ungaphakathi kwalo, kaliyikuwiswa; uNkulunkulu uzalisiza ngovivi lokusa.

6 Izizwe ziyahlokoma, imibuso iyachitheka; ukhupha ilizwi lakhe umhlaba uncibilike.

7 UJehova uSomandla ulathi; uNkulunkulu kaJakhobe uyinqaba yethu.

8 Wozani libone imisebenzi kaJehova, incithakalo aseyenzile emhlabeni.

9 Uyathulisa izimpi kuze kube semikhawulweni yomhlaba; uyalephula idandila avadlaze lomkhonto, utshisa izihlangu ngomlilo.

10 “Thulani, lazi ukuba mina nginguNkulunkulu; ngizaphakanyiswa phakathi kwezizwe; ngizaphakanyiswa emhlabeni.”

11 UJehova uSomandla ulathi, uNkulunkulu kaJakhobe uyinqaba yethu.